Lev 13 | NdeIBE | STEP | UJehova wathi kuMosi lo-Aroni,

Leviticus 13

Imithetho emayelana lesikhwekhwe

1 UJehova wathi kuMosi lo-Aroni, 2 “Loba ngubani ozabe evuvukile loba equbukile loba elechatha elicazimulayo ejwabini lakhe okungasuka kube ngumkhuhlane wejwabu othelelwanayo, kumele alethewe ku-Aroni umphristi loba kweyinye yamadodana akhe engumphristi. 3 Umphristi kahlole lesi isilonda esisejwabini lakhe kuthi kungabonakala ukuthi uboya obusesilondeni sebumhlophe kanti lesilonda laso sizikile enyameni, kuyabe kungumkhuhlane wejwabu lakhe othelelwanayo. Nxa umphristi emhlola, uzakuthi kuye ungcolile ngokomlayo. 4 Kanti-ke lanxa ibala elisejwabini limhlophe kodwa libonakala ukuthi alijulanga enyameni njalo loboya obukhonapho bungakabimhlophe, umphristi kamsuse ebantwini ahlale yedwa okwezinsuku eziyisikhombisa. 5 Ngosuku lwesikhombisa umphristi kamhlole, kuthike nxa ebona ukuthi isilonda lokhu sinjalo njalo kasiqhelanga ejwabini, kumele amehlukanise kwabanye okwezinye njalo izinsuku eziyisikhombisa. 6 Ngosuku lwesikhombisa umphristi uzamhlola njalo, kuthike nxa isilonda sesifiphele singaqhelanga ejwabini, umphristi uzakutsho ukuthi lowo muntu usehlambulukile, bekukade kuyikuqubuka kodwa nje. Leyo ndoda izagezisa izigqoko zayo njalo iyabe isihlambulukile. 7 Kodwa ukuqubuka kungaqhela ejwabini lakhe ngemva kokuba eseke waziveza kumphristi ukuba kuthiwe usehlambulukile, kumele aziveze njalo kumphristi. 8 Umphristi uzamhlola, kuthi-ke nxa ukuqubuka kuqhelile ejwabini, umphristi athi kahlambulukanga; kuyisifo esithelelwanayo.

9 “Nxa ekhona olomkhuhlane othelelwanayo wejwabu, kumele alethwe kumphristi.

10 Umphristi kamhlole, kuthi nxa kuleqhubu elimhlophe eseliphendule uboya babamhlophe njalo lilomlomo, 11 kuyisifo sejwabu esingapholiyo ngakho umphristi uzakuthi ungongcolileyo. Kangamehlukanisi labanye, ngoba uvele esengongcolileyo.

12 “Nxa isifo sigcwala ejwabini lonke, okubonwa ngumphristi ukuthi sigcwele ejwabini kusukela ekhanda kuze kube sezinyaweni, 13 umphristi uzamhlola kuthi nxa isifo sesigcwele umzimba wonke, atsho athi lowo muntu uhlambulukile. Njengoba ijwabu seliphenduke labamhlophe lonke, uyabe ehlambulukile. 14 Kodwa nxa kubonakala sekupetuka inyama esilondeni uzabe engongcolileyo. 15 Umphristi nxa ebona inyama isipetuka uzakuthi ungcolile. Inyama epetukileyo ingcolile; ulesifo esithelelwanayo.

16 Kodwa leyonyama epetukileyo ingaguquka ibemhlophe kufanele onjalo aye kumphristi.

17 Umphristi kamhlole, kuthi nxa izilonda sezisuke zaba mhlophe, umphristi uzakuthi lowo olazo uhlambulukile; kube uzabe esehlambulukile.

18 Nxa kulomuntu olethumba ejwabini lakhe libe seliphola, 19 kuthi lapha obekulethumba khona kubonakale kumhlotshana kuvuvukile loba iqhubu elibomvana, kumele azilethe kumphristi. 20 Umphristi kalihlole, kuthi nxa kubonakala lijulile loboya obuphezu kwalo sebumhlophe, umphristi uzakuthi ungcolile. Yisifo esithelelwanayo esivela lapha obekulethumba khona. 21 Kodwa nxa, khona laphayana ekuhlolweni kwalo ngumphristi, kungelaboya obumhlophe phezu kwalo njalo lingajulanga njalo selifiphele, kulapho umphristi azamehlukanisa khona labanye okwensuku eziyisikhombisa. 22 Nxa liqhela ejwabini, umphristi uzakuthi ungcolile, lona liyisifo esithelwanayo. 23 Kodwa nxa umbala walo ulokhu unjalo, njalo lingaqhelanga, kuyabe kulitshisa elatshiywa lithumba ngakho umphristi, uzakuthi uhlambulukile.

24 “Nxa umuntu elethuthuva ejwabini lakhe besekuvela itshatha elibomvu okumhlotshana loba elimhlophe enyameni epetukileyo yetshisa

25 umphristi kalihlole, kuzakuthi nxa uboya obuphezu kwalo sebumhlophe, kubonakale kungani kujulile, kuyisifo esithelelwanayo esesivela ngethuthuva. Umphristi uzakutsho ukuthi ungcolile kuyisifo sejwabu usithelelwanayo. 26 Kodwa umphristi angalihlola kubonakale kungelaboya obumhlophe kungajulanga njalo sekufiphele, yikho lapho umphristi ezamehlukanisa labanye okwezinsuku eziyisikhombisa. 27 Ngosuku lwesikhombisa umphristi uzamhlola, kuthi nxa liqhela ejwabini, umphristi athi ungcolile, kuyisifo sejwabu esithelelwanayo. 28 Kodwa nxa itshatha lilokhu linjalo futhi lingaqhelanga ejwabini kodwa selifiphele, kuyabe kulithuthuva elidumbileyo, umphristi uzakuthi uhlambulukile, bekulitshisa nje kuphela.

29 “Nxa owesilisa loba owesifazana elesilonda ekhanda loba esilevini, 30 umphristi kasihlole, kuthi nxa kubonakala sijulile enyameni inwele phezu kwaso zilithanga zinciphile, umphristi uzakuthi lowomuntu ungcolile, kuyikuluma komzimba, kuyisifo esithelelwanayo esekhanda loba esesilevu.

31 Kodwa nxa umphristi angasihlola isilonda leso abone singajulanga, kungelanwele ezimnyama kuso, umphristi uzamsusa lowomuntu ebantwini okwezinsuku eziyisikhombisa. 32 Ngosuku lwesikhombisa, umphristi kumele asihlole leso silonda, kuthi nxa singaqhelanga ejwabini njalo kungelaboya obulithanga phezu kwaso khona kubonakala ukuthi asijulanga enyameni, 33 kufanele aphucwe kutshiywe indawo elesifo, kuthi umphrsiti aphinde amehlukanise kwabanye okwezinsuku eziyisikhombisa. 34 Ngosuku lwesikhombisa umphristi asihlole, kuthi nxa singaqhelanga njalo kukhanya singajulanga enyameni, umphristi athi uhlambulukile. Kufanele agezise izigqoko zakhe, abesesiba ngohlambulukileyo. 35 Kodwa nxa isilonda siqhela ejwabini emva kokuba sekuthiwe usehlambulukile, 36 umphristi uzamhlola, kantike nxa isilonda sisuke saqhela ejwabini, akuswelakali ukuthi umphristi adinge ukubona uboya obulithanga; lowo muntu ungcolile.

37 Kodwa nxa ngokubona kwakhe isilonda leso silokhu singaguqukanga sekulenwele ezimnyama kuso siyabe sesipholile. Uyabe esehlambulukile, umphristi uzakuthi uhlambulukile.

38 “Nxa indoda loba owesifazane elamabala amhlotshana ejwabini, 39 umphristi kawahlole, kuthi nxa amabala lawo emhlotshana okungani kufiphele, kuyabe kuyikuqubuka okumveleleyo ejwabini; ngakho lowo muntu uhlambulukile.

40 “Nxa indoda ingaselanwele isilempabanga, ihlambulukile. 41 Nxa ingaselanwele phezu kwebunzi, isilempabanga ihlambukile. 42 Kodwa nxa ilesilonda esibomvana simhlotshana ekhanda elilempabanga loba ebunzini, kuyisifo esithelelwanayo esiyabe siqalisa ekhanda loba ebunzini. 43 Umphristi kayihlole leyondoda, kuthi nxa isilonda esivuvukayo ekhanda layo loba ebunzini sibomvanaokumhlotshana njengesifo sejwabu esithelelwanayo,

44 leyondoda ilesifo njalo ingcolile. Umphristi uzakuthi leyondoda ingcolile ngenxa yaleso silonda ekhanda layo. 45 Umuntu olesifo esithelelwanayo njengaleso kumele agqoke izigqoko ezidabukileyo, ayekele inwele zakhe zibutshapha, embese ingxenye yangaphansi kobuso bakhe amemeze athi: “Ngingcolile! Ngingcolile!’ ” 46 Kuzakuthi nxa elokhu elaleso sifo ahlale engongcolileyo. Kumele ahlale yedwa, ahlale ngaphandle kwesihonqo.

Imithetho emayelana lobulephero

47 Nxa isigqoko sagqokwa ngumuntu olobulephero – isambatho sewulu loba ilembu,

48 eselukiweyo loba esiphothiweyo kuyiwulu loba ilembu, isikhumba loba yini eyenziwe ngesikhumba – 49 nxa lokhu kungcola ngesifo kwesambatho, isikhumba, loba yini eyelukiweyo, loba ephothiweyo loba kuyini okwesikhumba, nxa kubonakala kuluhlazana loba kubomvana, kuyisifo esiqhelayo; kufanele kutshengiswe umphristi 50 Umphristi kahlole ukungcola lokhu ngesifo abesesehlukanisa leyonto esingcolile ibekwe yodwa okwezinsuku eziyisikhombisa. 51 Ngosuku lwesikhombisa uzamele akuhlole, kuthi nxa isifo sokungcola sesiqhelile esigqokweni, eselukiweyo loba esithungiweyo, loba isikhumba, loba sisetshenziswani, lokho kuyisifo esibulalayo, lesosambatho singcolile. 52 Kumele asitshise leso sigqoko, loba eselukiweyo lesithungiweyo kuyiwulu loba ilembu, loba kuyinto yesikhumba elesifo sokungcola, njengoba kuyisifo sokungcola esibulalayo; leyonto kumele itshiswe.

53 Kodwa, nxa kuyikuthi ekuhlolweni kwaso ngumphristi, kubonakale ukuthi isifo asiqhelanga ezigqokweni, loba eselukiweyo loba esithungiweyo, loba esesikhumba, 54 uza laya ukuthi lololutho olungcolileyo kalugeziswe. Kulapho-ke azakwehlukanisa, kwezinye okwensuku eziyisikhombisa.

55 Ngemva kokuba lesosambatho esingcolileyo sesigezisiwe, umphristi uzasihlola, kuthi nxa isifo sokungcola esisesigqokweni singaguqukanga umbala waso lanxa siyabe singaqhelanga, singcolile. Tshisa ngomlilo, loba isifo sokungcola sihlasele nganxanye. 56 Nxa, lapho umphristi esihlola, kubonakale isilonda sesifiphele ngemuva kokugeziswa kwesigqoko, umphristi kadabule ingxenye ebilesifo esigqokweni loba yisikhumba loba ngeselukiweyo loba ngesiphothiweyo. 57 Kodwa nxa isifo sibonakala futhi esigqokweni, ingabe eselukiweyo loba esiphothiweyo, loba kungesesikhumba, siyabe siyaqhela, akuthi konke okulesifo kutshiswe ngomlilo. 58 Isigqoko siphi lasiphi, kungaba ngesokwelukwa, esokuphothwa loba esesikhumba esesike sageziswa sahlanzwa lesosifo kumele sigeziswe futhi, kube yikho ukuhlanzeka kwaso.”

59 Le yiyo imilayo emayelana lokungcoliswa yisifo lesi esithelelwanayo ezigqokweni loba ngezewulu loba ezelembu, kungaba ngezelukiweyo loba eziphothiweyo, loba isikhumba; ukuze kuthiwe zihlambulukile loba zingcolile.